Arnold Şvartzeneger saatına görə hava limanında saxlanıldı
Arnold Şvartzeneger iqlim böhranı ilə mübarizə xeyriyyə təşkilatına kömək etmək üçün hərracda satmağı planlaşdırdığı 26.000 avroluq Audemars Piguet saatını bəyan etmədiyi iddiası ilə çərşənbə günü Münhen hava limanında gömrük işçiləri tərəfindən qısa müddətə saxlanılıb.
Almaniyanın Bild qəzeti gömrük rəsmilərinə istinadən xəbər verir ki, Avstriya əsilli aktyor və Kaliforniya ştatının keçmiş qubernatoru Los-Ancelesdən Münhenə gələndə təxminən üç saat hava limanında saxlanılıb.
Şvartzenegerin baqajında axtarış aparan məmurlar onu kənara çəkiblər və aktyorun gəlişində gömrük blankında bəyan etmədiyi iddia edilən saatı tapıblar.
Münhendəki Baş Gömrük İdarəsinin sözçüsü bildirib ki, saat xaricdən gətirildiyi üçün qeydiyyatdan keçməli idi.
Şvartzeneger səlahiyyətlilərə saatını İqlim Təşəbbüsünə bağışlandığını və cümə axşamı günü axşam Avstriyanın Kitzbühel xizək kurortunda keçiriləcək tədbirdə hərraca çıxarılacağını söyləyib.
Bild-in məlumatına görə, səlahiyyətlilər Şvartzenegerdən 4 min avro vergi və 5 min avro cərimə də daxil olmaqla 35 min avro tələb ediblər.
Aktyorun cəriməni kredit kartı ilə ödəməyi təklif etdiyi deyilir, lakin Almaniya gömrük qaydalarına görə cərimənin yarısı nağd şəkildə ödənilməlidir.
Gömrük işçilərinin Şvartzenegerin səyahətinə davam etməsinə icazə verilməmişdən əvvəl onu nağd pul çıxarmaq üçün banka müşayiət etdiyi bildirilir.
