Pakistan: "Hindu millətçiliyinin yüksələn dalğası beynəlxalq ictimaiyyəti narahat edir"
Pakistanın müvəqqəti hökumətinin baş naziri Ənvarul Hak Kakar bildirib ki, Hindutva və ya anti-müsəlman əhval-ruhiyyəsindən ilhamlanan hindu millətçiliyinin artması beynəlxalq ictimaiyyət, o cümlədən ABŞ üçün dərin narahatlıq doğurur.
Dawn qəzetində yer alan xəbərə görə, Kakar Birləşmiş Millətlər Təşkilatının (BMT) 78-ci Baş Assambleyasında iştirak etdiyi Nyu Yorkda Beynəlxalq Əlaqələr Şurasında (CFR) açıqlama verib.
Kakar, anti-müsəlman əhval-ruhiyyəsindən ilhamlanaraq artan hindutva və ya hindu millətçiliyinin ABŞ da daxil olmaqla beynəlxalq ictimaiyyət üçün dərin narahatlıq doğurduğunu və hindutva ideoloqlarının bölgədən kənara çıxmağa təşviq edildiyini bildirib.
Hindistanın baş naziri Narendra Modinin hindu milliyətçiliyi ideologiyasını Kanadada öldürülən separatçı siqhlərlə əlaqələndirən Kakar, Qərb paytaxtlarının iqtisadi və strateji səbəblərdən bu həqiqəti görməməzlikdən gəlməyə üstünlük verdiyini vurğulayıb.
Kakar Pakistanın Hindistanla sülh münasibətləri qurmaq istəyinin davam etdiyinə diqqət çəkərək, bu gözləntinin Yeni Dehli hökumətinin qarşılıqlı səmimiyyətini tələb etdiyini bildirib.
Hindistanın 5 avqust 2019-cu ildə Cammu və Kəşmirin xüsusi statusunu ləğv etməsinə toxunan Kakar, Yeni Dehlinin addımlarının bütün bölgəni qaranlığa sürüklədiyini bildirib.
Kakar Cammu və Kəşmirdə insan haqları pozuntularının pisləşməsindən narahat olduqlarını bildirib və ABŞ-ı Cammu və Kəşmir məsələsini sülh yolu ilə və region xalqlarının istəklərinə uyğun həll etmək üçün Hindistana təsirindən istifadə etməyə çağırıb.
Güclü Pakistan-ABŞ əlaqələrinin Cənubi Asiyada və onun hüdudlarından kənarda sabitlik və tərəqqi üçün güc ola biləcəyini bildirən Kakar, İslamabadın Vaşinqton və dinc, firavan dünya vizyonuna sahib olan bütün tərəfdaşlarla işləməyə hazır olduğunu vurğulayıb.
Pakistanın həm ABŞ, həm də Çinlə əlaqələri davam etdirmək əzmində olduğuna diqqət çəkən Kakar ölkəsinin heç bir siyasi düşərgədə olmaq istəmədiyini də qeyd edib.
