Yeni paltarları aldıqdan sonra mütləq yumalısınız - SƏBƏB
Yumasaq hansı nəticələrə səbəb ola bilər? Təbii ki, hər kəsi düşündürən sualdır. Bu haqda xarici mediadan götürdüyümüz materialda.
Paltarların həmişə yeni, təmiz görünməsi üçün onlara müxtəlif kimyəvi maddələr vurulur. Məsələn, formaldehid. Bu maddə tez-tez tranzit zamanı bakteriya böyüməsinin və kalıbın inkişafının qarşısını almaq üçün paltarlara tətbiq olunur.
Nəticə etibarı ilə belə paltar yuyulmamış geyinilərsə, səpgi, qaşınma və digər allergik reaksiyalara səbəb ola bilər. Eyni səpgilər parçalara ləkə salan boyalara məruz qalmanın nəticəsi ola bilər. Yuyulduqdan sonra boyanın bir hissəsi yuyulur.
Əksər mağazalarda insanlar ilk növbədə geyimləri sınayır, ölçüsünü və üslubunu seçirlər. Buna görə də, əlimizə bir şeyi götürərkən, bizdən əvvəl bir çox insanın onu geyə biləcəyinə hazır olmalıyıq. Odur ki, dəri hissəcikləri və təhlükəli mikroorqanizmlər parça üzərində qala bilər ki, bu da dermatit, qaşınma və qızartıya səbəb ola bilər.
Zavod istehsalı olan paltarlar mağazaya çatmazdan əvvəl müxtəlif nəqliyyat vasitələrindən istifadə etməklə qablaşdırılır və bir yerdən başqa yerə daşınır.
Məhsulun bütün marşrutunu və onun saxlanma şəraitini izləmək demək olar ki, mümkün deyil. Buna görə də, əlinizə keçməzdən əvvəl əşyanın müxtəlif patogenlər və mikroblarla təmasda olması riski var.
Bütün bu səbəblərə görə satın alındıqdan sonra paltar yuyulmalı və yalnız bundan sonra geyinilməlidir.
