Gömrük Komitəsindən Türkiyə vətəndaşları ilə bağlı iddialara cavab
Dövlət Gömrük Komitəsi sosial şəbəkələrdə Azərbaycana gələn Türkiyə vətəndaşlarından rüşvət alınması ilə bağlı iddialara aydınlıq gətirib.
AFN.az xəbər verir ki, bu barədə Komitənin mətbuat katibi Natiq Axundov öz feysbuk hesabında yazıb.
Onun sözlərinə görə, sosial şəbəkələrdə və bəzi kütləvi informasiya vasitələrində özünü Türkiyə vətəndaşları kimi təqdim edən bir qrup şəxs tərəfindən çəkilən və ölkəmizin gömrük orqanlarına qarşı əsassız iddiaların yer aldığı video yayımlanıb. Videoda həmin şəxslər gömrük-sərhəd keçid məntəqələrinin birində onlardan qanunsuz ödənişlərin tələb olunduğunu və alınan vəsaitə görə qəbz verilmədiyini iddia edirlər:
“Dövlət Gömrük Komitəsinin aidiyyəti qurumları tərəfindən dərhal aparılan araşdırma zamanı müəyyən olunub ki, həmin video Beynəlxalq Dəniz Ticarəti Limanının ərazisində qeydə alınıb. Lakin videonun qeydə alındığı və həmin şəxslərin ödəməni həyata keçirdiyi məkan limanın giriş qapısında, gömrük zonasının xaricindədir. Yəni hadisə gömrük zonasından kənarda baş verib. Onların ödədiklərini iddia etdikləri vəsaitlərin gömrük orqanlarına aidiyyəti yoxdur. Belə ki, limanda perron, körpü, gəmi və parklanma üçün göstərilən xidmətlərə görə alınan vəsait gömrük orqanlarının səlahiyyətinə aid deyil.
Komitənin Vahid Avtomatlaşdırılmış İdarəetmə Sistemi vasitəsilə aparılan araşdırma nəticəsində ölkə ərazisinə giriş-çıxış zamanı həmin şəxslərdən hər hansı gömrük ödənişlərinin alınmadığı müəyyən edilib”.
Komitə rəsmisi əlavə edib ki, mövcud qanunvericiliyə görə sərhədkeçmə proseslərində motosikletlərdən, ümumiyyətlə hər hansı ödəniş tələb olunmur.
