İsveçrə əhalini 10 milyon nəfərlə məhdudlaşdırmaq təklifini səsverməyə çıxaracaq
İsveçrədə əhalinin 2050-ci ilə qədər 10 milyon nəfərlə məhdudlaşdırılmasını nəzərdə tutan ifrat sağçı təklif bu həftə sonu referanduma təqdim olunur.
AFN.az xəbər verir ki, iqtisadçılar və hökumət rəsmiləri səsvermədən "bəli" cavabı çıxacağı təqdirdə ölkə iqtisadiyyatının ağır zərbə alacağı barədə xəbərdarlıq edirlər.
Ölkənin ən böyük siyasi hərəkatı olan ifrat sağçı İsveçrə Xalq Partiyası tərəfindən irəli sürülən təklif ölkə əhalisinin nəzarətsiz şəkildə artması və bu vəziyyətin infrastruktur, mənzil, təhsil, həmçinin sosial rifah sistemləri üzərində daşına bilməyən bir yük yaratması ideyasına əsaslanır.
Təklifə uyğun olaraq, əhalinin sayı 2050-ci ildən əvvəl 9,5 milyona çatarsa, ailə birləşməsi, oturma icazələri və sığınacaq müraciətlərinə çox ciddi məhdudiyyətlərin gətirilməsi hədəflənir.
Əgər bu tədbirlərə baxmayaraq 10 milyonluq hədd keçilərsə, İsveçrə hökuməti Avropa İttifaqı ilə imzalanmış azad hərəkət müqaviləsini birtərəfli qaydada ləğv etmək məcburiyyətində qalacaq. Bu addımın atılması İsveçrənin Avropa vahid bazarına çıxışının tamamilə başa çatması mənasına gəlir.
Tərəfdarlar bu addımın İsveçrə həyat tərzini qorumaq üçün zəruri olduğunu müdafiə etdiyi halda, əleyhdarlar isə bu təklifi mürəkkəb problemlərə təqdim olunan qeyri-real və bəsit bir populist yanaşma kimi qiymətləndirirlər.
İsveçrədəki birbaşa demokratiya sistemi müəyyən müddət ərzində kifayət qədər imza toplayan hər bir təklifin xalq səsverməsinə çıxarılmasına imkan verir.
Lakin bu dəfə aralarında təklifi irəli sürən partiyadan olan nazirlərin də yer aldığı yeddi üzvlü koalisiya hökuməti bu təklifə birgə qarşı çıxır.
Hökumət rəsmiləri, parlamentin hər iki palatası, işçi həmkarlar ittifaqları və iş dünyasının nümayəndələri bu radikal məhdudiyyətin İsveçrənin rifahını və iqtisadi sabitliyini təhlükəyə atacağını bildirirlər.
Ekspertlər İsveçrənin də bir çox digər Avropa ölkələri kimi doğum səviyyəsinin aşağı düşməsi və əhalinin sürətlə qocalması səbəbindən kənardan gələcək işçi qüvvəsinə ehtiyac duyduğunu vurğulayırlar.
Gələcək otuz il ərzində 65 yaşdan yuxarı əhalinin payının ciddi dərəcədə artması gözlənilərkən, işçi qüvvəsi bazarına gətiriləcək süni bir məhdudiyyətin istehsalı dayanma nöqtəsinə gətirə biləcəyi ifadə edilir.
Dünya miqyasında daha əvvəl heç bir ölkənin öz əhalisinə dəqiq bir yuxarı hədd qoymaq üçün səsverməyə getmədiyi qeyd olunarkən, bu səsvermə qlobal miqyasda bir ilk xüsusiyyəti daşıyır.
Keçirilən son rəy sorğuları təklifin əleyhinə olanların az fərqlə öndə olduğunu göstərsə də, nəticələrin bir-birinə çox yaxın olacağına işarə edir.
İsveçrədə seçicilərin böyük əksəriyyəti səslərini poçt vasitəsilə verməyə üstünlük verir.
Təklifin qanuniləşməsi üçün həm ümumi seçici çoxluğunun təmin edilməsi, həm də kantonların (əyalətlərin) əksəriyyətinin razılığı tələb olunur.
Tarixi səsvermənin dəqiq nəticələrinin bazar günü günortadan sonra məlum olacağı gözlənilir.
