"Anthropic" şirkətinin rəhbərindən süni intellekt üçün məcburi tənzimləmə çağırışı
"Anthropic" şirkətinin baş icraçı direktoru Dario Amodei süni intellektin özü ilə gətirdiyi risklərə qarşı yalnız şəffaflığın kifayət etmədiyini bildirib.
AFN.az xəbər verir ki, o, bu sahədə daha ciddi və məcburi tənzimləmələrin həyata keçirilməsinin vacibliyini vurğulayıb.
Amodei süni intellektin sürətli inkişafı fonunda necə bir siyasət yürüdülməli olduğuna dair məqalə yazıb. Həmin yazıda Amodei süni intellektin son dərəcə sürətlə irəlilədiyini, buna qarşılıq olaraq siyasətin formalaşdırılması, xüsusən də qanunvericilik proseslərinin çox daha ləng hərəkət etdiyini qeyd edib.
O, Konqresin hərəkətə keçməsinin illərlə çəkə biləcəyi bir prosesdə süni intellektin əyləncəli bir oyuncaqdan dahilərlə dolu bir ölkəyə çevrilə biləcəyi barədə xəbərdarlıq edib.
Son dövrlərdə süni intellektin gücünə və onun yaratdığı risklərə dair sübutların daha qabarıq şəkildə nəzərə çarpdığını göstərən Amodei, xüsusilə kibertəhlükəsizlik sahəsindəki risklərin diqqət çəkdiyini, bununla yanaşı, bioloji risklərin və gələcəkdə süni intellektin muxtariyyətindən qaynaqlanan təhlükələrin də ortaya çıxa biləcəyini düşündüyünü ifadə edib.
Müəllif məqalədə süni intellekt dövründə yenidən nəzərdən keçirilməli olan beş əsas siyasət sahəsinə işarə edərək bunların tənzimləmə və ictimai təhlükəsizlik, makroiqtisadiyyat və vergi siyasəti, elmi innovasiya, dövlət ilə cəmiyyət arasındakı güc balansı və geosiyasət olduğunu qeyd edib.
Süni intellekt risklərinə qarşı yalnız şəffaflığın bəs etmədiyini müdafiə edən Amodei bu sahədə şəffaflıq hüdudlarını aşaraq daha ciddi və məcburi qaydaların tətbiqinə ehtiyac duyulduğunu vurğulayıb.
O, süni intellekt tənzimləmələrinin ABŞ Federal Aviasiya Administrasiyası (FAA) kimi qurumları nümunə götürməli olduğunu bildirərək qabaqcıl süni intellekt modellərinin də eynilə təyyarələr kimi texniki sınaqlardan və yoxlamalardan keçməsinin məcburi olmasını, yüksək təhlükəsizlik standartlarına cavab vermədikləri təqdirdə isə ictimai təhlükəsizliyə təhdid yaratdıqları əsası ilə istifadəyə verilməsinin əngəllənməsini və ya bazardan geri çağırılmasını təklif edib.
Süni intellektin əvvəlki texnologiyalarla müqayisədə insan idrak qabiliyyətlərinin daha ümumi iqtisadi əvəzləyicisinə çevrilə biləcəyinə və iqtisadiyyatı çox daha sürətlə transformasiya edəcəyinə diqqət çəkən Amodei süni intellektin işçi qüvvəsi bazarında əvvəlki texnologiyalara nisbətən çox daha böyük və potensial olaraq daha qalıcı sarsıntılar yarada biləcəyini düşünməyin məntiqli olduğunu qeyd edib.
Amodei işçi qüvvəsi bazarında yarana biləcək risklərə qarşı əməkhaqqı sığortası, ixtisarların azaldılmasına yönəlmiş işəgötürən təşviqləri və təhsil qrantları kimi siyasət təklifləri irəli sürərkən, uzunmüddətli perspektivdə ümumi baza gəliri və universal kapital hesabları kimi mexanizmlərin də dəyərləndirilməli olduğuna işarə edib.
Digər tərəfdən, "Anthropic" şirkəti Amodeinin məqaləsi ilə birlikdə qabaqcıl süni intellekt modellərinin sınaqdan keçirilməsinə dair bir qanun təklifi və işçi qüvvəsi itkisi ilə bağlı siyasət çərçivəsi sənədini də dərc edib.
