Rusiya: "Yeni START"ın başa çatması ilə milli maraqlarımızı qoruyacağıq
Kremlin mətbuat katibi Dmitri Peskov strateji nüvə silahlarının məhdudlaşdırılmasını nəzərdə tutan "Yeni Strateji Silahların Azaldılması Müqaviləsi"nin (Yeni START) müddətinin bitməsi ilə Rusiyanın öz milli maraqlarına uyğun addımlar atacağını bildirib.
Peskov paytaxt Moskvada jurnalistlərə verdiyi açıqlamada bu gün müddəti başa çatan "Yeni START"ın artıq qüvvədə olmadığını vurğulayıb: "Biz bunu mənfi qiymətləndiririk və bu məsələ ilə bağlı təəssüfümüzü ifadə edirik. Məhdudiyyətləri daha bir il saxlamaq təşəbbüsümüz cavabsız qaldı", – deyə o qeyd edib.
Müqavilənin sona çatmasından sonra ölkəsinin atacağı addımlara toxunan Peskov bildirib ki, Rusiya nüvə silahlarının strateji sabitliyi məsələsində məsuliyyətli və diqqətli yanaşmasını davam etdirir və əlbəttə ki, hər zaman olduğu kimi, ilk növbədə öz milli maraqlarını qoruyacaqdır.
Peskov həmçinin bəzi Qərb media qurumlarında ABŞ-lı Ceffri Epşteynin Rusiya kəşfiyyatı ilə əlaqəli olması barədə iddialara cavab verərək, "Bu növ ssenarilər haqqında zarafat etməyi çox istərdim, lakin gəlin vaxtımızı boşa xərcləməyək" ifadəsini işlədib.
"Yeni START" Müqaviləsi Nədir?
ABŞ-ın Sovet İttifaqı ilə 1991-ci ildə və Rusiya Federasiyası ilə 1993-cü ildə imzaladığı "Strateji Silahların Azaldılması Müqavilələri"nin (START 1 və START 2) davamı olan "Yeni START" sazişi 2010-cu ildə imzalanıb.
Vaşinqton və Moskva arasında qüvvədə olan bu son nüvə sazişi uzaqmənzilli nüvə başlıqlarına və raketlərə məhdudiyyət qoyur. Rusiya ötən il müddəti bitən müqavilənin öhdəliklərinə daha 1 il əməl edəcəyini açıqlamışdı. Həmin əlavə müddət isə məhz bu gün başa çatıb.
Stokholm Beynəlxalq Sülh Araştırmaları İnstitutunun (SIPRI) məlumatlarına görə, 2025-ci il etibarilə Rusiya 5 459, ABŞ isə 5 177 nüvə başlığı ilə dünyada ən çox nüvə silahına sahib olan iki ölkədir. Çinin nüvə başlıqlarının sayının isə 600-dən bir qədər çox olduğu təxmin edilir.
