İndoneziyada Levotobi vulkanı püskürüb
İndoneziyanın Flores adasındakı (Şərqi Nusa Tengqara əyaləti) Levotobi vulkanı püskürüb.
AFN.az xəbər verir ki, bu barədə İndoneziyanın Vulkanologiya və Geoloji Fəlakətlərin Azaldılması Mərkəzi məlumat yayıb.
Mərkəzin məlumatına görə, kül Levotobi Laki-Laki kraterindən 10 000 metr və ya dəniz səviyyəsindən 11 584 metr yüksəkliyə qalxıb. Kül və tüstü qərb, şimal-qərb və cənub-qərb istiqamətlərində intensiv şəkildə yayılır. Mərkəz sakinləri və turistləri yerli hökumətin göstərişlərinə əməl etməyə, vulkan tüstüsü və küldən qorunmaq üçün maskalar və respiratorlardan istifadə etməyə çağırıb.
Levotobi Flores adasının cənub-şərq hissəsində yerləşən əkiz zirvəli vulkandır. Daha aktiv zirvə olan Levotobi Laki Laki (dəniz səviyyəsindən 1584 m hündürlükdə) yüksək Perempuanın (1703 m) 2,1 km şimal-qərbində yerləşir.
Dünyanın ən böyük arxipelaqı olan İndoneziya arxipelaqı 18.000 adadan ibarətdir və Sakit Okeanın "Od halqası" adlanan hissəsində yerləşir. Bu bölgə intensiv seysmik fəaliyyətə həssasdır. İndoneziyada 500-dən çox vulkan var və onlardan təxminən 130-u aktivdir.
