Güzəştli ipoteka qaydaları dəyişdi: Qarabağ və Şərqi Zəngəzuru da əhatə edəcək
Azərbaycan Prezidenti tərəfindən imzalanan fərmana əsasən, "İpoteka və Kredit Zəmanət Fondunun vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası"na dəyişikliklər edilib.
AFN.az xəbər verir ki, bu haqda deputat Vüqar Bayramov bildirib. Onun sözlərinə görə, sənəd ipoteka kreditlərinin verilməsinə dair yeni tələbləri müəyyənləşdirir. Bu dəyişikliklə Qarabağ və Şərqi Zəngəzurda güzəştli şərtlərlə mənzil əldə etmək mümkün olacaq.
Yeni qaydalara əsasən, güzəştli ipoteka kreditinin həcmi işğaldan azad olunmuş bölgələrdə yaşayış sahəsinin bazar qiymətinin 90 faizini keçə bilməz. Bundan əlavə, həmin ərazilərdə ipoteka kreditləri üzrə aylıq ödənişlər borcalanın ümumi gəlirinin 75 faizindən artıq olmamalıdır. Bu məhdudiyyət isə yalnız kredit məbləği ilkin bazardakı mənzilin 60 faizindən aşağı olduqda tətbiq edilmir.
Deputat qeyd edib ki, qaydaların yenilənməsi gənc ailələrin Qarabağ və Şərqi Zəngəzurda daha əlverişli şərtlərlə mənzil sahibi olmalarına şərait yaradacaq. Bu, həm bölgədə məskunlaşma prosesini sürətləndirəcək, həm də işğaldan azad edilən ərazilərdə iqtisadi inkişafı dəstəkləyəcək. Eyni zamanda, bu addım gənclərin mənzil təminatının yaxşılaşdırılması baxımından da önəmlidir.
Ümumilikdə, yeni dəyişikliklər Qarabağda güzəştli mənzil imkanlarının artırılmasına və həmin regionların sosial-iqtisadi inkişafına mühüm töhfə verəcək.
