"Azercell" interneti bahalaşdırır, imkanları azaldır - abunəçilər etiraz edir
“Azercell Telekom” 1 iyuldan internet paketləri və SimSim tariflərində dəyişikliklər edəcək
"Azercell Telekom" 2025-ci il iyulun 1-dən etibarən internet paketləri və fakturasız (SimSim) xətt sisteminə aid bəzi tariflərdə dəyişikliklərə başlayacaq. Şirkətin yaydığı məlumata görə, bir sıra paketlərin qiymətləri artırılacaq, bəzilərinin isə istifadə müddəti azaldılacaq.
Aylıq internet paketlərində dəyişikliklər
6 GB, 12 GB və 30 GB həcmində aylıq internet paketlərinin qiyməti əvvəlki kimi qalacaq, lakin istifadə müddəti 30 gündən 28 günə endiriləcək.
55 GB-lıq aylıq paket 56 GB-a qədər artırılacaq, lakin bu paket üçün də istifadə müddəti 28 gün olacaq.
Saatlıq limitsiz internet paketlərinin qiymət artımı
1 saatlıq limitsiz internet paketi 0,59 AZN-dən 0,99 AZN-ə yüksəldiləcək.
3 saatlıq paket 1,49 AZN-dən 1,99 AZN-ə qədər artırılacaq.
Günlük internet paketlərində dəyişiklik
250 MB və 1000 MB-lıq günlük internet paketləri ləğv edilir.
Onların əvəzinə 350 MB (0,99 AZN) və 1,5 GB (1,99 AZN) paketləri təqdim olunacaq.
Bəzi paketlərə qoşulma dayandırılır
“1.5 GB aylıq”, “6 saatlıq” və “Həftəsonu” paketlərinə yeni qoşulmalar iyulun 1-dən dayandırılacaq.
“Pulsuz WhatsApp” kampaniyası da həmin tarixdən etibarən aylıq paketlər üçün qüvvədən düşəcək.
SimSim tarif sistemində yeniliklər
Avtomatik aylıq abunə sistemi
2025-ci il iyunun 19-dan etibarən SimSim xətt istifadəçiləri üçün balansda kifayət qədər vəsait olduqda aylıq abunə haqqı avtomatik olaraq balansdan tutulacaq və xətt istifadəyə açıq qalacaq.
Əgər balansda kifayət qədər vəsait olmazsa, əvvəlki qaydalara uyğun olaraq xətt birtərəfli bağlanacaq və kartın nominalına əsasən istifadə müddəti tətbiq ediləcək.
İstifadə müddəti qaydaları
1 iyuldan etibarən bütün danışıq kartları üçün istifadə müddəti əvvəlki qaydada – kartın nominalına uyğun +90 gün olacaq.
Elektron ödənişlərdə istifadə müddəti ödənilən məbləğə əsasən fərqli şəkildə hesablanacaq. Bu zaman minimal məbləğ 1 AZN təşkil edəcək.
Abunəçilərin narazılığı artır
Qeyd edilən dəyişikliklər sosial şəbəkələrdə və istifadəçi forumlarında geniş etirazla qarşılanıb. Abunəçilər qiymət artımının xidmət keyfiyyəti ilə uyğun olmadığını bildirir, istifadə müddətinin azaldılmasını isə "gizli qiymət artımı" kimi qiymətləndirirlər.
Bəzi istifadəçilər uzun müddətdir istifadə etdikləri tarif və bonusların xəbərdarlıq edilmədən dəyişdirilməsindən narazılıq edərək alternativ mobil operatorlara keçməyi düşündüklərini bildiriblər.
Mobil rabitə üzrə ekspertlər bildirirlər ki, bu tip dəyişikliklərdən əvvəl ictimai rəy nəzərə alınmalı və məlumatlandırma prosesi daha şəffaf aparılmalıdır.
