Fransa ABŞ-dan Azadlıq heykəlini geri qaytarmasını tələb edir
"Biz sizə Azadlıq heykəlini verdik, amma deyəsən, siz ona xor baxırsınız".
AFN.az xarici mediaya istinadən xəbər verir ki, bunu Fransa parlamentinin deputatı Raphael Qluksmann özünün mərkəz solçu "Place publique" partiyasının qurultayında amerikalılara xitabən deyib.
Ukraynanı fəal şəkildə dəstəkləyən Qluksman çıxışında Vaşinqtonun Moskva ilə yaxınlaşmasını pisləyib. Onun sözlərinə görə, ABŞ tiranların tərəfinə keçməyə qərar verib. Fransız siyasətçi Donald Tramp administrasiyasını öz elmi azadlıqlarında israr edən alimləri işdən çıxardığına görə də tənqid edib.
Azadlıq heykəli fransız Auguste Bartholdi tərəfindən yaradılıb və Amerika İnqilab Müharibəsi zamanı iki ölkə arasındakı ittifaqın xatirəsinə fransız xalqının amerikalılara hədiyyəsi olaraq ABŞ-a verilib. 46 metr hündürlüyündə olan mis heykəl Nyu-Yorkun Azadlıq adasında yerləşir.
AFP qeyd edir ki, bir vaxtlar yaxınlıqdakı Ellis adasında Birləşmiş Ştatlara girməyi gözləyən milyonlarla immiqrant üçün o, daha yaxşı həyata ümidi simvolizə edirdi.
