11 yaşlı Mahirin yaşaması üçün bizim dəstəyimiz lazımdır! - FOTOLAR
Mahir Tahirovun 11 yaşı var. Kəskin leykozdan əziyyət çəkir. Ailəsi uzun illərdir onun müalicəsi üçün çalışır. İndi isə ilik köçürülməsinə ehtiyac yaranıb. Həkimlər bildirirlər ki, bu əməliyyat reallaşsa Mahir yaşayacaq.
Atası Elmahir Tahirov deyir ki, Mahirin müalicəsi 6 il İranda aparılıb. Ondan sonra səhhətində xeyli yaxşılaşma olub. Lakin keçirdiyi qorxu nəticəsində yenidən xəstəlik baş qaldırıb. Bakıda Milli Hematologiya və Transfuziologiya Mərkəzində 4 ay müalicə olunub, orada bildirilib ki, Mahirə təcili ilik köçürülməlidir: "Türkiyəyə apardıq, hazırda İstanbulda "Emsey" xəstəxanasındadır. İlik köçürülməsinə başlamaq üçün kimyaterapiyaya başlayıblar. 2 aydır kimyaterapiyadadır. 7 ampula dərmana 20 min dollar pul veririk, hər ay üçün 11 min dollar ödəyirik orda qalmağına. Ümumi 73500 dollar xərcim çıxıb 2 ayda. Donor tapmışıq, 80 min dollar pul lazımdır əməliyyat üçün. Hazırda bu vəsaiti tapmağa gücümüz yoxdur, indiyədək müalicələri olan-qalanımızı satıb etmişik. İlk dəfədir ki, 100 faiz uyğun gələn donor tapmışıq, o əldən çıxsa bir də aylar sürəcək yeni donorun tapılması. Öz bacısı donor kimi uyğun gəlmədi, yoxsa əməliyyat üçün 80 yox, 60 min dollar lazım olacaqdı.
Bütün fondlara müraciət etmişəm, amma heç birindən cavab çıxmayıb. Xahiş edirəm həmvətənlərimdən, imkanlı şəxslərdən, mənə kömək etsinlər".
