ABŞ-da 51 milyondan çox seçici erkən səs verib
Noyabrın 5-də ABŞ-da keçiriləcək prezident seçkilərinə bir həftə qalmış erkən səsvermə prosesində ölkə üzrə 51 milyondan çox seçicinin səs verdiyi bildirilib.
"The Hill"in yazdığına görə, 60-cı prezident seçkiləri üçün geri sayım davam edərkən, milyonlarla amerikalı seçici poçt vasitəsilə və ya seçki məntəqələrində vaxtından əvvəl səsvermə hüququndan istifadə etməyə davam edir.
Florida Universitetinin Seçki Laboratoriyasının sistemləri elan edib ki, dünən yerli vaxtla saat 16:00-a kimi ABŞ-da erkən səsvermənin mövcud olduğu ştatlarda 24 milyondan çox adam poçt vasitəsilə erkən və təxminən 27 milyon insan şəxsən səs verib.
Hazırkı say amerikalıların 2020-ci il seçkilərində Covid-19 pandemiyası səbəbindən poçtla verilən 154 milyondan çox səsin təxminən üçdə birini təşkil edir.
İndiyədək 51 milyonu keçən erkən səsvermə ümumi seçki nəticələrinin güclü göstəricisi kimi qəbul edilmir.
Miçiqan, Pensilvaniya və Şimali Karolina kimi kritik mübahisəli ştatların hər birində 1,44 milyondan çox erkən səs verilib. Harris və Tramp üçün ən kritik bölgələr olaraq görülən bu ştatlar Konqresə nəzarətin müəyyən edilməsində də təsirli rol oynayır.
Bir çox ştatlarda erkən səsvermə seçki gününə qədər davam etsə də, poçtla və ya seçki məntəqəsinə gedərək verilən erkən səslər noyabrın 5-də verilən səslərlə birlikdə həmin gün sandıqlar bağlandıqdan sonra hesablanacaq.
244 milyon seçicinin olduğu ABŞ-da 2020-ci il prezident seçkilərində 66,6 faizlik rekord fəallıq qeydə alınıb və 159 milyona yaxın insan səs verib.
Qeyd edək ki, ABŞ prezidenti Co Bayden noyabrın 5-də keçiriləcək prezident seçkiləri üçün doğma şəhəri Delaverdə erkən səs verib.
Mənbə: AA
