NASA Marsda yeni həyat ehtimalı aşkar edib
Marsdakı buz qapaqlarının altında həyatı dəstəkləyə biləcək ərimiş su hovuzları ola bilər.
AFN.az xarici mediaya istinadən xəbər verir ki, bu, NASA-nın yeni araşdırması nəticəsində məlum olub. Araşdırmalara görə, günəş işığı planetin tozlu buz təbəqələrinin altına nüfuz edərək fotosintez üçün əlverişli şərait yarada bilir. Bu ərimiş su cibləri, ehtimal ki, Yerdəki kriyokonit dəliklərinə bənzər Marsın tropik bölgələrində tapıla bilər.
Marsda həyatın birbaşa sübutu olmasa da, NASA-nın yeni tədqiqatları mikroorqanizmlərin planetin donmuş səthinin altında yaşaya biləcəyinə dair ümidverici ipucları təqdim edir.
Alimlər kompüter modellərindən istifadə edərək Marsda kifayət qədər günəş işığının su buzunun altına nüfuz edə biləcəyini və bu ərimiş su ciblərində fotosintezin baş verə biləcəyini göstəriblər.
Marsın səthində su və karbon qazından ibarət iki növ buz var. Tədqiqat su buzuna yönəlib.
Keçmişdə Marsa yağan qarın tozla qarışaraq donması nəticəsində əmələ gələn bu buzlaqlar zamanla bərkimiş və hələ də toz hissəcikləri ilə doludur.
Bu toz günəş işığını udur və buzlaqdan bir neçə metr aşağıda olan buzu əridə bilir. Marsın nazik atmosferi su buzunun səthdə əriməsini çətinləşdirsə də, buzun altındakı su cibləri bu şərtlərdən təsirlənməyə bilər.
Araşdırmaya görə, Marsdakı tozlu buz səthin 3 metr altına qədər fotosintez üçün kifayət qədər günəş işığını ötürə bilər.
Buzun üst təbəqələri suyun buxarlanmasının qarşısını alır və onu zərərli radiasiyadan qoruyur, altındakı su cibləri isə mikroorqanizmlər üçün yaşayış mühitini təmin edə bilir.
Marsın tropik bölgələri belə ərimiş su hovuzlarının ən çox ehtimal olunan yerlər arasında görünür. Bu bölgələr gələcəkdə insanlı və ya robotlaşdırılmış missiyalar üçün kəşfiyyat hədəfləri kimi seçilə bilər.
Tədqiqatçılar laboratoriya mühitində Marsda tozlu buzları yenidən yaratmaq və araşdırmaq məqsədi ilə Marsın ən çox ehtimal olunan ərimiş su bölgələrinin xəritəsini çəkməyə başlayırlar.
