İsveçrə sərhədlərində fövqəladə tədbirlər görür
İsveçrə Almaniyada keçiriləcək futbol üzrə Avropa çempionatı və Parisdə keçiriləcək Olimpiya Oyunları zamanı sərhəd nəzarətini artıracaq.
Federal hökumətin verdiyi açıqlamaya görə, bu tənzimləmənin səbəbi idman tədbirləri ilə bağlı artacaq terror təhlükəsidir.
Açıqlamaya görə, İŞİD Avropa Futbol Çempionatı və Olimpiya Oyunlarına hücum etməklə hədələyib və bu məqsədlə silahlılarını çağırıb.
Daxili və xarici kəşfiyyat xidmətləri terror təhlükəsinin olduğunu bildirib. Bu vəziyyətə əsaslanaraq Federal Hökumət iyun-sentyabr ayları arasında sərhəd nəzarətini artırmaq qərarına gəlib. Sərhəd nəzarətinin artırılması İsveçrə və qonşu ölkələrdə təhlükəsizliyi artırmaq məqsədi daşıyıb.
Təhlükəsizlik rəsmilərinin fikrincə İsveçrə terror təşkilatı üçün daha az diqqət mərkəzində olsa da, ictimai tədbirlər onu hədəfə çevirə bilər.
İyunun 14-də Almaniyada futbol üzrə Avropa çempionatı, iyulun 26-dan sentyabrın 8-dək isə Olimpiya və Paralimpiya Oyunları başlayacaq.
