Kolumbiyada polislərə hücum edildi - 6 nəfər yaralandı
Kolumbiyanın cənub-qərbində polis əməkdaşlarına təşkil edilən bombalı hücumda 2-si polis olmaqla 6 nəfərin yaralandığı açıqlanıb.
Cənubi Amerika ölkəsi Kolumbiyanın Cauca inzibati bölgəsindəki Morales qəsəbəsində polis qruplarına kustar bomba ilə hücum təşkil edilib. Hadisə zamanı 2-si polis olmaqla 6 nəfər yaralanıb.
Hadisə şahidlərinin sözlərinə görə, hücumu otelin yaxınlığında motosikletli insanlar həyata keçirib. Partlayışdan qısa müddət sonra polis idarəsinə də atəş açılıb və əraziyə çoxlu hüquq-mühafizə orqanlarının əməkdaşları göndərilib.
Hadisədən sonra açıqlama verən Kolumbiya prezidenti Qustavo Petro hücumun qəbuledilməz olduğunu bildirib və orduya əməliyyat əmri verdiyini açıqlayıb.
