Böyük Britaniyada parlament seçkiləri 2024-cü ilin yazında keçirilə bilər
Britaniya parlamentinin İcmalar Palatasına (aşağı palata) ümumi seçkilər 2024-cü ilin yazında keçirilə bilər.
Bu barədə “The Daily Telegraph” qəzeti yazıb.
Nəşrin məlumatına görə, Böyük Britaniya Xəzinədarlığının yüksək rütbəli rəsmiləri indi büdcə mesajının əksər hallarda olduğu kimi martda deyil, fevralda təqdim edilməsi imkanlarını müzakirə edirlər. "The Daily Telegraph" belə planların yazda keçiriləcək parlament seçkilərinə hazırlıqdan xəbər verdiyini qeyd edib. Səsvermə 2025-ci ilin yanvarından gec olmayaraq keçirilməlidir. Britaniya mediası daha əvvəl 2024-cü ilin oktyabr və ya noyabr aylarını əsas prioritet kimi göstərmişdi.
Əksər rəy sorğularına görə, qarşıdan gələn seçkilərdə müxalifətdə olan Leyboristlər Partiyası favorit hesab olunur. Orta hesabla respondentlərin təxminən 45%-i leyboristlərə, 24%-i isə 13 ildir hakimiyyətdə olan Mühafizəkarlar Partiyasına səs verməyə hazırdır.
