ABŞ HHQ Minuteman III ICBM-ni sınaq buraxılışı zamanı anomaliyaya görə məhv edib
ABŞ hərbçiləri Minuteman III qitələrarası ballistik raketini (ICBM) Kaliforniyadakı Vandenberq Kosmik Qüvvələri bazasından sınaq buraxılışı zamanı aşkar edilən anomaliyaya görə məhv edib.
Bu barədə ABŞ Hərbi Hava Qüvvələrinin Qlobal Hücum Komandanlığının bəyanatında bildirilib.
Sənəddə qeyd edildiyi kimi, Minuteman III “noyabrın 1-də saat 00:06-da sınaq buraxılışı zamanı aşkar edilən anomaliyaya görə Sakit Okean üzərində təhlükəsiz şəkildə məhv edilib. Komandanlıq buraxılış zamanı hansı anomaliyanın aşkar edildiyini dəqiq izah etməyib, bunu müəyyən etmək üçün hərtərəfli təhlil aparılacaq.
“Uğursuz işə salınmanın səbəblərini araşdırmaq üçün analitik qrup yaradılır”, - deyə bəyanatda deyilir. ABŞ Hərbi Hava Qüvvələri anomaliyaya və ICBM-nin sonradan məhv edilməsinə baxmayaraq, sınaq buraxılışı zamanı mühüm məlumatların əldə edildiyini vurğulayıb.
Bundan əvvəl Pentaqonun mətbuat katibi Patrik Rayder Vandenberq Hərbi Hava Qüvvələri bazasından Minuteman III-ün əvvəlcədən planlaşdırılmış sınaq buraxılışını elan edib. Onun sözlərinə görə, bu buraxılış strateji çəkindirmə sisteminin etibarlılığını nümayiş etdirmək, eləcə də müttəfiqlərə ABŞ-ın zəmanətləri ilə bağlı siqnal kimi xidmət etmək məqsədi daşıyırdı.
Bu, Minuteman III-ün bu il dördüncü sınaq buraxılışı idi. Minuteman III-ün fevral, aprel və sentyabr aylarında keçirilmiş əvvəlki sınaqları uğurlu olmuşdur.
