Aİ İranın MAQATE müfəttişlərinin akkreditasiyasını ləğv etməsini pisləyib
Avropa İttifaqı İranı Beynəlxalq Atom Enerjisi Agentliyinin (MAQATE) bir neçə müfəttişinin akkreditasiyasını ləğv etmək qərarına yenidən baxmağa çağırıb.
Tehran və dünya gücləri arasında 2015-ci il nüvə sazişini koordinasiya edən Brüssel İranın qərarından həddən artıq narahatlığını ifadə edib. “Xüsusi narahatlıq doğuran məsələ bu qərarın agentliyin yoxlama fəaliyyətlərini həyata keçirmək, o cümlədən Birgə Kompleks Fəaliyyət Planının (JCPOA) həyata keçirilməsinin monitorinqi qabiliyyətinə birbaşa və əhəmiyyətli təsir göstərməsidir”, - deyə Aİ rəsmisi bildirib.
Öz növbəsində, İran Xarici İşlər Nazirliyi müfəttişlərin geri çəkilməsinin ABŞ, Fransa, Almaniya və Böyük Britaniyanın “siyasi sui-istifadələrinə” cavab olduğunu bildirib. Ümumilikdə, KİV-in məlumatına görə, Fransa və Almaniyadan olan səkkiz müfəttiş akkreditasiyadan məhrum edilib.
Qeyd edək ki, akkreditasiyası ləğv edilən ekspertlər Nüvə Silahlarının Yayılmamasına dair Müqavilənin (NPT) Qorunma Müqaviləsi çərçivəsində yoxlamalar aparırdılar. MAQATE qeyd edib ki, geri çağırılan bütün işçilər zənginləşdirmə texnologiyaları sahəsində unikal biliyə malik agentlik ekspertləridir.
