Almaniya kansleri Şolz: NATO Sammiti alyans daxilində birliyi artırdı
Almaniya kansleri Olaf Şolz Litvanın paytaxtı Vilnüsdə keçirilən NATO Sammitinin alyans daxilində birliyi artırdığını və uğurla keçdiyini bildirib.
Zirvənin sonunda təşkil edilən mətbuat konfransında danışan Olaf Şolz çətin bir dövr olduğuna və Avropanın təhlükəsizlik təzyiqi altında olduğuna diqqət çəkib.
"Bu sammit NATO-nu bir daha gücləndirdi, bununla da onun müdafiəyə hazır olduğunu vurğuladı və alyans daxilində birliyi artırdı. Ona görə də Vilnüs çox uğurlu sammit oldu", - Şolz bildirib.
Kansler Şolz Vilnüs Sammitinin bir neçə səbəbə görə çox əhəmiyyətli olduğunu bildirərək, "Bu, Finlandiyanı yeni müttəfiq kimi sıralarımıza gətirdiyimiz ilk zirvə idi. İsveç tezliklə müttəfiqlərimizdən biri olacaq. Əminəm ki, Finlandiya və İsveç ittifaqın təhlükəsizliyini gücləndirəcək" - deyə qeyd edib.
NATO-nun heç kimi təhdid etməyən bir müdafiə ittifaqı olduğunu vurğulayan Şolz, 2025-ci ildən etibarən ölkəsinin NATO-nun şərq cinahının güclənməsinə daha çox töhfə verəcəyinə diqqət çəkib: "NATO heç kimi təhdid etməyən, lakin istənilən hərbi təhlükəyə hazır və qadir olan müdafiə ittifaqıdır".
Kansler qeyd edib ki, NATO müttəfiqləri olaraq artan hərbi missiyaları yerinə yetirmək üçün daha çox investisiya lazımdır.
Ukrayna prezidenti Vladimir Zelenski ilə görüşünə toxunan Almaniya kansleri ölkəsinin lazım olduğu müddətdə Ukraynanı dəstəkləməyə davam edəcəyini bir daha vurğulayıb: "Böyük yeddilik çərçivəsində Ukrayna qarşısında təhlükəsizlik öhdəlikləri Kiyevin arxalana biləcəyi uzunmüddətli strategiya deməkdir".
Ukraynanın NATO-ya üzvlük məsələsi ilə bağlı Şolz aşağıdakı qiymətləndirməni edib: "Hər kəsin bildiyi və illərdir NATO-ya üzv olmaq istəyən hər kəsə tətbiq etdiyi NATO-nun mövcud qaydaları var. Heç bir ölkə bunlardan azad deyil. Bu arada tənzimləmədə inteqrasiya, əməkdaşlıq üçün ilkin şərtlər, demokratiya və hüquqi vəziyyətlər kimi məsələlər var. Amma biz hazırda tamam başqa vəziyyətdəyik. Söhbət Ukraynanı çox konkret şəkildə dəstəkləməkdən gedir, biz bunu edirik".
