Yaponiyada daha 330.000 toyuq məhv edilib
Yaponiyanın Aomori prefekturasında yeni quş qripi epidemiyası qeydə alınıb. Bu səbəbdən həmin ərazidə 330 minə yaxın toyuq məhv edilib.
AFN.az yerli mediaya istinadən xəbər verir ki, aidiyyatı qurumlara təsərrüfatlardan birində tələf olan quşların sayının artması ilə bağlı məlumat daxil olub. Quş qripi virusunun olub-olmaması üçün aparılan sınaqdan sonra 13 quşdan 11-nin nəticələri müsbət olub. Quş qripinin bu epidemiyası cari mövsümdə Aomori prefekturasında üçüncü haldır. Tədbir olaraq 330 minə yaxın toyuq məhv edilib.
Bundan başqa, xəstəliyin aşkarlandığı təsərrüfat ətrafında üç kilometr radiusda quşların daşınması üçün karantin tətbiq edilib.
Bu mövsüm Yaponiyada quş qripinin sürətlə yayılması səbəbindən 15 milyondan çox ev quşu öldürülüb. Bu, 9,87 milyon quşun öldürülməli olduğu keçən 2020-2021 mövsümündən xeyli yüksəkdir. Ötən ilin oktyabrından etibarən ölkənin 47 prefekturasından 25-də bir-birinin ardınca quş qripi aşkarlanıb, 80 xəstəliyə yoluxma faktı qeydə alınıb. Ötən il 47 prefekturadan 18-də 52 quş qripi halı aşkar edilmişdi.
Xəstəlik səbəbindən istehsal azalıb. Nəticədə yapon yumurtasının qiyməti son 29 ilin ən yüksək səviyyəsinə qalxıb.
