Ukrayna iqtisadiyyatının bərpası 411 milyard dollara başa gələcək - Dünya Bankı
Rusiyanın hücumundan sonra Ukrayna iqtisadiyyatının bərpası 411 milyard dollara başa gələcək ki, bu da Ukraynanın 2022-ci ildə gözlənilən ÜDM-dən 2,6 dəfə çoxdur.
AFN.az xəbər verir ki, bu barədə Dünya Bankına istinadən "Reuters" məlumat yayıb. Açıqlanan məbləğ ötən ilin sentyabrında hesablanan 349 milyard dollarlıq təxmindən xeyrli artıqdır. Qiymətləndirmələrə əsasən, Ukraynanın 2023-cü ildə yenidənqurma və bərpa üçün kritik və prioritet investisiyalar üçün 14 milyard dollara ehtiyacı olacaq ki, bu da Ukraynanın 2023-cü il büdcəsində nəzərdə tutulandan 11 milyard dollar artıq maliyyə tələb edəcək.
Tələblərin təxminən 22%-i nəqliyyat, 17%-i mənzil, 11%-i enerji və 7%-i kənd təsərrüfatı istiqamətindədir.
Dünya Bankının məlumatına görə, ən böyük proporsional artım enerjidə baş verib. Bu istiqamətdə zərər 2022-ci ilin iyun ayı səviyyəsindən beş dəfədən çox olub.
Ən böyük dağıntılar oktyabrdan bəri Rusiyadan güclü raket hücumlarına məruz qalan Donetsk, Xarkov, Luqansk və Xerson kimi cəbhə bölgələrində baş verib.
Dünya Bankının Avropa və Mərkəzi Asiya üzrə vitse-prezidenti Anna Bjerde bildirib ki, Ukraynaya davamlı dəstək həm ölkəyə, həm də qlobal iqtisadiyyata qoyulan sərmayədir. "İnkişaf üzrə tərəfdaşların dövlət investisiyalarına dəstəyi bərpa üçün mövcud maliyyəni artırmaq üçün əhəmiyyətli özəl investisiyalarla tamamlanmalıdır" - deyə DB rəsmisi bildirib.
Xatırladaq ki, bundan əvvəl Dünya Bankı Ukraynaya qrant şəklində 2,5 milyard dollar ayırmışdı.
