Azərbaycanda ölmüş şəxsə sığorta borcu gəlib
Azərbaycanda vəfat edən şəxsə sığorta borcu ilə bağlı bildiriş gəldiyi iddia olunur.
Bununla bağlı sosial şəbəkələrdə fotolar paylaşılıb.
Məlumata əsasən, 2018-ci ildə vəfat edən Tovuz rayon sakini Həsənova Svet İslam qızına 187 manat məcburi dövlət sosial sığorta borcu, 40 manat isə icbari tibbi sığorta borcu ilə bağlı bildiriş gəlib.
Mesajın gəldiyi nömrə isə mərhumun adınadır. Məlumatı mərhumun qızı təsdiqləyib.
Lakin maraqlıdır ki, bildirişdə qeyd olunan vergi ödəyicisinin eyniləşdirmə nömrəsi Əliyev Elşən Mustafa oğlu adınadır.
Məsələ ilə bağlı Dövlət Vergilər Xidmətindən bildirilib ki, bildirişin həmin nömrəyə göndərilməsində yanlışlıq ola bilər: "İstənilən halda vergi və sığorta borcu ilə bağlı öhdəlik VÖEN-in məxsus olduğu şəxsin üzərindədir. Vətəndaşların mobil telefon nömrəsinə vergi orqanından səhvən SMS gəldiyi halda bu haqda Çağrı Mərkəzinə (195-1) və ya vergi ödəyicilərinə xidmət mərkəzlərinə müraciət etmələri tövsiyə olunur". ("Ölkə.az")
