Almaniyada enerjiyə qənaət tədbirləri PİK HƏDDƏ
Rusiya-Ukrayna müharibəsinin yaratdığı enerji böhranı səbəbindən çətinlik yaşayan Almaniyada bir çox sahədə enerjiyə qənaət məqsədilə tədbirlər gücləndirilir, ictimai binalarda və kilsələrdə otaq temperaturu 19 dərəcə ilə məhdudlaşdırılır.
AFN.az İHA-ya istinadən xəbər verir ki, Rusiya ilə Ukrayna arasında fevralın 24-də başlayan müharibənin yaratdığı enerji böhranı qışın gəlişi ilə daha da böyüyür. Təbii qaz ehtiyacının böyük hissəsini Rusiyadan qarşılayan Almaniya Rusiyaya tətbiq etdiyi embarqolar səbəbindən çətin günlər yaşayır. Qış mövsümünün gəlişi ilə mümkün olan hər sahədə enerji qənaəti tədbirlərini həyata keçirməyə başlayan ölkədə alınan qərarlara görə, ictimai binalar, universitetlər, kilsələr və hətta federal parlament də maksimum 19 dərəcəyə qədər qızdırıla bilər. Bəzi müəssisələrdə bu temperatur daha da aşağı ola bilər.
Qeyd edək ki, indiyədək bu ərazilər üçün tövsiyə olunan minimum temperatur 20 dərəcə idi. Almaniya Bundestaqı da enerjiyə qənaətin həyata keçirildiyi məqamlar arasında idi. Artıq Bundestaq deputatlarının kabinetlərində isti su yoxdur. Parlamentin palatalarındakı 1800 elektrik çaydanı söndürülüb. İsti su yalnız tualetlərdə və kommunal sahələrdə mövcuddur.
Kilsələrdə, xüsusilə dekabrın çox soyuq olan ilk həftələrində ibadətdə iştirak edən camaata adyallar paylanır. Bəzi kilsələrdə skamyaların altına elektrik qızdırıcıları qoyulmuşdu ki, onlar xidmətə az qalmış işə salınırdı. Ayinlər zamanı bəzi kilsələrdə temperaturun 15-16, bəzilərində isə 5 dərəcəyə qədər endiyi açıqlanıb. Bir çox yerlərdə universitet tələbələri dərslərə qalın qış geyimində getməli olurlar. Bəzi tələbələr dərslərə isti su torbaları da gətirirlər. Laboratoriyalarda istifadə olunmayan cihazlar söndürülür.
Alman Dövlət Dəmir Yolları şirkəti də qənaət tədbirlərinə qoşulub. Maşınistlər təlim kurslarında enerjiyə 10 faizə qədər qənaət etməyi öyrəniblər. Sistemin sürücülük təklifləri və mexanikanın ətraf mühitə uyğun sürmə tərzi ilə enerji sərfiyyatı orta hesabla yüzdə 10 azalıb. Məsələn, Münhen və Hamburq arasındakı səyahətdə mexaniklərin yüksək sürətli qatarla uzun məsafələrə daşınmasında 1300 kilovat-saat elektrik enerjisinə qənaət edə bildikləri açıqlanıb. Bu rəqəm Almaniyada orta ev təsərrüfatlarının bir ildə istehlak etdiyi enerji miqdarına uyğundur. Paytaxt Berlində fəaliyyət göstərən şəhərətrafı qatarlar da axşam reyslərinin və vaqonların sayını azaldıb.
Enerji böhranı dekabrın sonuna qədər ölkə daxilində qurulan minlərlə Milad bazarına da təsir edib. Milad bazarları bu il enerjiyə qənaət etməli olub. Bazarlarda bir çox təşkilatçılar və satıcılar daha az işıqlandırma qoyurlar. Burada istifadə olunan lampaların əksəriyyəti enerjiyə qənaət edən LED lampalarla əvəz olunub. Milad bazarının işıqları indi bir saat gec açılır və bir saat tez sönür. Xüsusilə Kudammda ənənəvi küçə işıqlandırma problemi mağaza sahiblərindən və tapılan sponsorlardan yığılan pullarla bir qədər həll olunub. Amma indi Kudamm da az işıqla qısa müddət ərzində işıqlandırılır.
Paytaxt Berlində Senat bu il Milad bayramında küçələrin işıqlandırılması üçün büdcə ayırmayacağını açıqlayıb. Yaşıllar Partiyasının millət vəkili Renate Künast bu yaxınlarda sosial media hesabında "Ofisdə əllərimi isitmək üçün palto və bir stəkan isti su ilə oturmuşam. Otağın 19 dərəcə olduğundan şübhələnirəm. Gələn həftə isti su şüşəsi, ədyal və papaqla gələcəm" - deyə yazmışdı.
