"Yeni qanun dəyişiklikləri “qara bazar”ın həcmini xeyli artıracaq" - ŞƏRH
AFN.az-ın xəbərinə görə, dəyişikliyi şərh edən iqtisadçı ekspert Natiq Cəfərli bildirib ki, belə qadağaların, məhdudiyyətlərin çirkli pul dövriyyəsi və korrupsiya ilə mübarizədə heç bir effekt vermir: "Bunlar yalnız 2 faktiki nəticə doğurur. Birincisi, sənəddə qanunsuz, qeyri-qanuni pul köçürmələr nə deməkdir – bunun aydın izahı və təsnifatı yoxdur. Deməli nəzarətedici orqanlara bu əlavə fürsət verir ki, sadə vətəndaşları, iş adamlarını incitsinlər, yəni, bu tam tərsi, korrupsiyaya yol açacaq. İkincisi isə bu addımın nəticəsi olaraq “cibdən-cibə”, “əldən-ələ” pul köçürmələri artıracaq. Heç kimə sirr deyil ki, ölkədə müəyyən sistem, şəbəkə qurulub ki, onlar vasitəsi ilə müəyyən % müqabilində Azərbaycandan dünyanın istənilən ölkəsinə istəlilən məbləğdə vəsaiti ötürmək mümkündür. Yeni qanun dəyişiklikləri “qara bazarı”, “qara pul köçürmələrin” həcmini xeyli artıracaq".
N.Cəfərlinin sözlərinə görə, hökumət hələ də sovet düşüncəsi, o yanaşmanın inersiyası ilə davranır: "SSRİ zamanı ən sərt qanunlar, cəzalar belə nə “alverçiliyin” (əslində alverçilər əsl biznesmenlər idi), nə də qara valyuta bazarının qarşısını ala bilmədilər, çünki, dünyada iki anlayışın – pulun və ideyanın qarşısını inzibati yollarla almaq mümkün deyil. Ağıllı ölkələr və sistemlər qadağan edə bilmədiyini idarə etməyə çalışır – bizim sistem isə buna qadir deyil".
