Daxili bazar araşdırmasının aparılmasına dövlət dəstəyi göstərilir
2020-ci ildə Kiçik və Orta Biznesin İnkişafı Agentliyinin (KOBİA) dəstəyi ilə mikro, kiçik və orta biznes (KOB) subyektlərinin müraciəti əsasında 7 daxili bazar araşdırması aparılıb.
2021-ci ildə KOB-lardan daxil olan müraciətlər əsasında daxili bazar araşdırmalarının aparılmasına dövlət dəstəyinin göstərilməsi davam etdirilməklə yanaşı, KOBİA-nın təşəbbüsü ilə də daxili bazar araşdırmaları aparılacaq. Hazırda qida, kənd təsərrüfatı, xidmət, tekstil və s. sahələr üzrə daxili bazar araşdırmalarının aparılması istiqamətində müvafiq tədbirlər görülür. Agentliyin təşəbbüsü ilə həyata keçiriləcək daxili bazar araşdırmaları KOB subyektlərinin müraciəti əsasında aparılan bazar araşdırmasından fərqli olaraq fərdi deyil, bütün sahibkarların istifadəsi üçün nəzərdə tutulur və araşdırmaların nəticələri KOB subyektlərinin istifadəsi üçün KOBİA-nın saytında (www.smb.gov.az) yerləşdiriləcək.
KOB subyektləri daxili bazar araşdırmasının aparılması üçün KOBİA-nın internet saytındakı müvafiq ərizə formasını (http://bit.ly/3keYxo9) doldurmaqla Agentliyə birbaşa və ya info@smb.gov.az vasitəsilə elektron müraciət edə bilərlər. Ətraflı məlumat üçün: 131 Çağrı Mərkəzi və (012) 404 04 01.
Məlumat üçün bildirək ki, daxili bazar araşdırmalarının aparılması üçün mikro, kiçik və orta sahibkarlıq subyektlərinə 2019-cu ildən etibarən dövlət dəstəyi göstərilir və bu dəstək KOBİA tərəfindən təmin edilir. Azərbaycan Respublikası Prezidentinin 29 may 2019-cu il tarixli “Mikro, kiçik və orta sahibkarlıq subyektlərinin rəqabətqabiliyyətli istehsalının stimullaşdırılması məqsədilə daxili bazar araşdırmalarına dövlət dəstəyi göstərilməsi Qaydası”na uyğun olaraq, mikro sahibkarlıq subyektinin müraciəti əsasında aparılan hər bir daxili bazar araşdırmasına çəkilən xərcin 80%-i, kiçik sahibkarlıq subyektinin müraciəti ilə həyata keçirilən araşdırmaya çəkilən xərcin 50%-i dövlət tərəfindən qarşılanır. Orta sahibkarlıq subyektləri isə bu dəstək mexanizmi çərçivəsində ödənişsiz təlim və seminarlardan, informasiya dəstəyindən yararlana bilərlər. Ümumilikdə hər bir daxili bazar araşdırmasının aparılmasına görə KOB subyektlərinə ödənilən dəstək məbləği 20 min manata qədərdir.
