Apple yeni "Siri" süni intellektini təqdim etdi
"Apple" istifadəçilər üçün daha yaxşı bir süni intellekt təcrübəsi təklif edəcəyini vəd etdiyi rəqəmsal asistentinin mühüm yenilənməsi olan "Siri AI" sistemini elan edib.
AFN.az xəbər verir ki, "iPhone" istehsalçısı uşaqların "Apple" məhsullarından istifadə edərkən daha təhlükəsiz qalmalarına kömək edəcəyini bildirdiyi etibarlılıq və təhlükəsizlik funksiyalarında bir sıra dəyişikliklər edəcəyini də açıqlayıb.
Sözügedən elanlar şirkətin illik Ümumdünya Tərtibatçılar Konfransında (WWDC) verilib.
Bu konfrans Tim Kukun 15 il boyunca icra etdiyi baş icraçı direktor (CEO) vəzifəsindən sentyabr ayında ayrılmasından əvvəlki sonuncu WWDC olması ilə diqqət çəkir. Kukun yerini WWDC-də mühüm aktivlik nümayiş etdirən, lakin əsas açılış nitqində çıxış etməyən Con Ternus tutacaq.
"Apple" şirkətinin "Siri AI" sistemini təqdim etməsi onun digər texnologiya nəhənglərindən geridə qaldığına dair tənqidlərin ardınca reallaşıb.
"Siri"nin yeni versiyası digər "Apple" məhsulları və tətbiqlərində işləyəcək, həmçinin "OpenAI" və "Anthropic" firmalarının süni intellekt asistentləri üçün təqdim etdiklərinə bənzər yeni bir tətbiqə sahib olacaq.
Şirkət "Siri AI" sisteminin istifadəçinin tətbiqlə keçmiş qarşılıqlı əlaqələrindən, təsvirlərin anlaşılmasından və geniş dünya məlumatlarından yararlanacağını, mövcud versiyasından daha bacarıqlı və dialoqa yönümlü bir asistent kimi xidmət göstərəcəyini vəd edib.
Proqram təminatı mühəndisliyi üzrə baş vitse-prezident Kreyq Federiqi xidmət etməli olduğu insanları nəzərə almadan, sadəcə süni intellekt yaratmış olmaq xatirinə nümayiş etdirilən yanaşmalara qarşı qeyri-adi bir kütləvi tənqid səsləndirib.
Federiqi real olaraq faydalı süni intellektin istifadəçiyə və onun ehtiyaclarına köklənməli olduğuna daxilən inandıqlarını bildirərək, "Apple"ın yeni "Siri AI" təcrübəsinin hər bir mərhələdə məxfiilik nəzərə alınmaqla hazırlandığını ifadə edib.
Hazırda "Apple Intelligence" yazı alətləri və təsvirlərin redaktəsini təklif etsə də, şirkət yeni və təkmilləşdirilmiş "Siri"ni istifadəyə verməkdə bir qədər yavaş davranır.
Sektor analiz firması "FDM CCS Insight"ın baş analitiki Ben Vud "Apple"ın süni intellekt sahəsindəki çatışmazlıqlarını aradan qaldırmaq məcburiyyətində olduğunu və WWDC-nin bəzi suallara cavab tapdığını qeyd edib.
Vud şirkətin məxfiilik yönümlü və inteqrasiya prioritetli yanaşmasının rəqibləri ilə sadəcə bərabərlik təmin etməklə qalmayıb, həm də mənalı şəkildə daha yaxşı gündəlik təcrübəyə çevrilə biləcəyini sübut etməli olduğunu sözlərinə əlavə edib.
Analitik uğur qazanılıb-qazanılmadığının yeni imkanlar istifadəçilərin ixtiyarına verildiyi zaman onların verəcəyi reaksiya ilə ortaya çıxacağını bildirib.
"Siri AI" sisteminin beta versiyası bu ilin sonlarında dəstəklənən və dili ingiliscə olaraq tənzimlənən cihazlarda istifadə edilə biləcək, lakin bu xidmət Avropa İttifaqında (Aİ) qüvvədə olmayacaq.
"Apple" tərəfindən edilən açıqlamada keçən bir neçə ay ərzində Aİ tənzimləyici qurumlarının digər virtual asistentləri təhlükəsiz şəkildə dəstəkləyərkən "Siri AI" sistemini Aİ-yə gətirmək üçün təklif olunan həll yollarının heç birini qəbul etmədiyi bildirilib.
Şirkət həmçinin "Google"un "Gemini" modellərinə və bulud texnologiyasına əsaslanacaq "Apple" Əsas Modellərini istifadəyə vermək üçün "Google" ilə tərəfdaşlıq qurub.
"Apple" həmçinin "iOS 27" platformasının təqdimatının bir hissəsi olaraq etibarlılıq və təhlükəsizlik təşəbbüslərindəki dəyişiklikləri də diqqətə çatdırıb.
Şirkət valideynlərin uşaqlarının kimlərlə danışa biləcəyinə nəzarət etməsini təmin edən və naməlum bir şəxslə danışmazdan əvvəl valideyn icazəsi tələb edən "soruş" funksiyasını genişləndirəcək.
"Apple" həmçinin sistem tərəfindən cinsi və ya zorakılıq tərkibli ola biləcəyi əsası ilə işarələnən və uşağın cihazına göndərilən hər növ təsviri avtomatik olaraq senzuralayacağını açıqlayıb.
Federiqi "Apple"ın uşaqların nələri görə biləcəyini, kimlərlə danışa biləcəyini və nə vaxt çıxış əldə edəcəklərini idarə etmək üçün güclü və istifadəsi asan alətlər təqdim etdiyini qeyd edib.
Şirkət uşaqları qorumaq üçün kifayət qədər səy göstərmədiyi əsası ilə bəzi uşaq təhlükəsizliyi müdafiəçilərinin etirazına səbəb olur.
Kiçik bir etirazçı qrup "Apple"ın "App Store"dakı uşaq təhlükəsizliyi yanaşmasını tənqid etmək məqsədilə açılış nitqindən əvvəl sabahın erkən saatlarında toplaşıb.
Bir müdafiə qrupu olan "HEAT Girişimi"ndən Sara Qardner "Apple"ın "App Store"dan bütün çılpaqlaşdırma texnologiyalarını kənarlaşdırmasını tələb edərək özünü "Apple" ziyarətçi mərkəzinin önündəki bir ağaca zəncirləyib.
Qardner şirkətin cinsi məzmunlu süni intellekt "deepfake" tətbiqlərindən azı 177 milyon dollar qazandığını idə edərək, "Apple"ın uşaqların cinsi istismarına yönəlmiş materialları "iCloud"dan silməsini də tələb edib.
"Apple" isə öz növbəsində çılpaqlaşdırma tətbiqlərinin qaydalara zidd olduğunu, bu növ bir çox tətbiqi proaktiv şəkildə rədd etdiklərini və sildiklərini müdafiə edir.
Ser Keyr Starmer isə etdiyi çıxışda "Apple" və "Google" da daxil olmaqla, texnologiya şirkətlərindən 18 yaşından kiçik hər kəs üçün smartfonlarda və digər cihazlarda çılpaq görüntülərə çıxışı əngəlləmələrini tələb etdiyini ifadə edib.
Tim Kukun "Apple"ın həmtəsisçisi Stiv Cobsun ölümündən qısa müddət əvvəl sağlamlıq səbəbləri ilə vəzifəsindən ayrılmasından sonra üzərinə götürdüyü CEO rolu ilə WWDC-yə sonuncu dəfə qatılması da xüsusi diqqət çəkib.
Kuk bu vəzifəni artıq 15 ildir icra edir.
"Apple Park"dakı salonda olan minlərlə "Apple" əməkdaşı və tərtibatçısı Kuku ayaq üstə alqışlayıb.
Kuk daha əvvəl heç vaxt bu qədər çox "iPhone"u bir yerdə görmədiyinə dair zarafat edib.
Vida edərkən duyğulandığı görünən Kuk tərtibatçılara müraciət edərək onların hekayələrini eşitməyi və dünya miqyasında bir çox insanın həyatını necə zənginləşdirdiklərini öyrənməyi çox sevdiyini dilə gətirib və "Apple" heyətinə təşəkkürünü bildirib.
