ChatGPT-də reklam dövrü başladı
Süni intellekt nəhəngi "OpenAI" məşhur çat-botu ChatGPT vasitəsilə gəlir əldə etmək strategiyasında yeni bir addım ataraq, ABŞ-dakı istifadəçilər üçün reklam nümayişlərinə başlayıb. Bazar ertəsi günü edilən rəsmi açıqlama ilə start götürən sınaq prosesi platformanın bu günə qədərki reklamsız strukturunda mühüm bir dəyişikliyin göstəricisidir.
Reklamlar ilk mərhələdə yalnız iki istifadəçi qrupunu əhatə edəcək:
"Free" (Pulsuz) istifadəçilər: Platformadan heç bir ödəniş etmədən yararlananlar.
"ChatGPT Go" abunəçiləri: Aylıq 8 dollar qarşılığında daha uyğun qiymətli seçim kimi təqdim olunan yeni abunəlik növünün istifadəçiləri.
"Plus", "Pro", "Business" və "Enterprise" kimi yuxarı seqment abunəlik paketlərindən istifadə edənlər isə xidmətdən reklamsız yararlanmağa davam edəcəklər.
Cavabların məzmununa təsir etməyəcək
"OpenAI" reklamların süni intellekt tərəfindən yaradılan cavabların dəqiqliyinə və ya tərəfsizliyinə təsir etməyəcəyi barədə istifadəçilərə zəmanət verib. Şirkətin açıqlamasında vurğulanıb ki, reklamlar söhbət axınının içində deyil, verilən cavabların altında və "sponsorlu" etiketi ilə aydın şəkildə qeyd olunaraq göstəriləcək.
Həmçinin bildirilib ki, şəxsi məlumatlar və söhbət məzmunları reklam verən şirkətlərlə paylaşılmır. Reklamlar yalnız cari söhbət mövzusu ilə bağlı ümumi tövsiyələr şəklində təqdim olunacaq.
Müəyyən mövzular və yaş qrupları istisnadır
Şirkət reklam modelində müəyyən etik məhdudiyyətlər tətbiq edəcəyini duyurub:
Yaş həddi: 18 yaşdan aşağı istifadəçilərə reklam göstərilməyəcək.
Həssas mövzular: Sağlamlıq, psixi sağlamlıq və siyasət kimi həssas və ya xüsusi tənzimləmə tələb edən mövzulardakı söhbətlərin yanında heç bir reklam yer almayacaq.
İstifadəçilər gördükləri reklamlar haqqında rəy bildirə biləcək, maraq dairələrində olmayan reklamları gizlədə biləcək və ya reklam fərdiləşdirmə xüsusiyyətlərini tamamilə söndürə biləcəklər. "OpenAI" bu prosesi "öyrənmə və sınaq" mərhələsi kimi xarakterizə edərək, istifadəçi təcrübəsinə xələl gətirmədən davamlı bir gəlir modeli yaratmağı hədəflədiyini açıqlayıb.
