Gecə klubunda əcnəbilərə hesab ödətdirmək istəyən qadınlar saxlanıldı
Bakıda gecə klubunda əcnəbilərə görə səs-küy salan xanımlar saxlanılıb.
1997-ci il təvəllüdlü Lamiyə və 1998-ci il təvəllüdlü Esmira adlı xanımlar barəsində İnzibati Xətalar Məcəlləsinin 510 və 535.1-ci maddələri ilə protokol tərtib edilib və işə məhkəmədə baxılıb.
Məlum olub ki, ərəb ölkələrindən olan əcnəbi vətəndaşlarla tanış olan qadınlar Səbail rayonu, Sahil metrosunun yanında yerləşən klubda yeyib-içib və əyləniblər. Bundan sonra əcnəbi vətəndaşlar onları kluba aparan xanımlardan yeyib-içdiklərinə görə hesab ödənilməsini tələb ediblər.
Xanımlar isə əksinə, hesabın əcnəbi vətəndaşlar tərəfindən ödənilməsini istəyiblər. Bundan sonra qadınlar klubun qarşısına keçərək küçədə səs-küy salmağa başlayıblar.
Saxlanılan qadınlar sözügedən maddələrlə təqsirli bilinib və məhkəmə tərəfindən 200 manat məbləğində inzibati cərimə ediliblər.
