Ermənistanda 2 nazir və 4 yüksək vəzifəli məmur istefa verib
Nikol Paşinyanın Ermənistan administrasiyasında dəyişiklik olacağı bəyanatından sonra 2 nazir, 4 komitə və şura sədri istefa verib.
Ermənistanın rəsmi xəbər agentliyi “Armenpress”in xəbərinə görə, baş nazir Paşinyanın Nazirlər Şurasında etməyi düşündüyü dəyişikliklərdən əvvəl 2-si nazir olmaqla 6 yüksək səviyyəli məmur bu gün istefa verib.
Bildirilib ki, daxili işlər naziri Vahe Qazaryan, regional idarələr və infrastruktur naziri Qnel Sanosyan, o cümlədən Ali Məhkəmə Şurasının sədri Karen Andreasyan, Dövlət Gəlirləri Komitəsinin sədri Rüstəm Badasyan, İstintaq Komitəsinin sədri Argişti Kyaramyan və Korrupsiyaya Qarşı Mübarizə Komitəsinin sədri Sasun Xaçatryan istefa ərizəsi yazıb.
Baş nazir Paşinyan Facebook hesabındakı paylaşımında bu istefaları tələb etdiyini, lakin bu tələbin şəxsi səbəblərlə deyil, sistem dəyişikliyi ilə bağlı olduğunu qeyd edib.
Paşinyanın bu gün Vatikana rəsmi səfərindən qayıdandan sonra istefaları qəbul edəcəyi və vəzifələrindən ayrılanların yerinə yeni təyinatlar edəcəyi gözlənilir.
Mənbə: AA
