İngiltərədə dövlət maliyyəsində 22 milyard funt-sterlinq boşluq haqqında müzakirələr getdikcə artır
Böyük Britaniyanın maliyyə naziri Raçel Rivz sələfi Ceremi Hantı dövlət maliyyəsində müəyyən etdikləri 22 milyard funt-sterlinq boşluq haqqında bilərəkdən və qəsdən yalan danışmaqda ittiham edib.
Britaniya mətbuatına açıqlama verən Rivz sələfinin millət vəkillərinə və ölkəyə dövlət xərcləri ilə bağlı yalan danışdığını iddia edərək, "Hant dövlət maliyyəsinin əsl vəziyyətini İcmalar Palatasından və ölkədən gizlədib. Bunu bilərəkdən və qəsdən etdi. Onlar seçki kampaniyası zamanı dövlət maliyyəsinin vəziyyəti barədə də yalan danışıb” ifadələrini işlədib.
Hant bu iddiaları rədd edib və bu qiymətləndirmələrə etiraz edərək məktubunda Rivzin İcmalar Palatasına təqdim etdiyi sənədin yanlış olduğunu iddia edib.
Qeyd edək ki, Rivz iyulun 4-də keçirilən seçkidə qalib gələn İşçi Partiyasının vəzifəyə başlamasından sonra həyata keçirilən daxili yoxlama çərçivəsində əvvəlki hökumətin xərclədiyi pulla büdcədə nəzərdə tutduqları məbləğ arasında 22 milyard funt sterlinq fərq aşkar etdiklərini söyləyib.
Bu uçurumu aradan qaldırmaq üçün ölkədəki 10 milyon varlı təqaüdçünün qış yanacağı ödənişlərinin və bəzi sosial baxım ödənişlərinin də ləğv edildiyini ifadə edən Rivz, vergiləri artıra biləcəklərinə də eyham vurub.
Mənbə: AA
