Doğum şəhadətnaməsi üçün 1000 manat rüşvət tələbi: "International Medical Center"ə ittihamlar
"İnternational Medical Center pul üçün uşaqların sağlamlığı ilə oynayır".
Belə bir iddia ilə Haldun Novruzzadə adlı şəxs sosial şəbəkədə çıxış edib.
"Dostum Ehtiram Həsənov sentyabr ayında yoldaşını doğum üçün Bakıda yerləşən International Medical Centerə aparıb. Uşaq normal anadan olub, hər şey əla. Səhəri gəliblər ki, bəs uşağınızın ciyəri açılmır, depozit qoyun, müalicə edək. Bərbər işləyən ata borc-xərc edib 2000 manata yaxın depozit qoyub. Sonra bir də depozit istəyəndə deyib ki, pulum yoxdu. Uşağı çıxarıb ayrı xəstəxanaya aparıb", - deyə H.Novruzzadə bildirib.
Onun sözlərinə görə, Ehtiram Həsənov 2 ay sonra uşağın doğum haqqında şəhadətnaməsini almaq üçün İnternational Medical Center-ə müraciət edib:
"Ona deyiblər ki, sənin 1600 manat verəcəyin var. Ehtiram Həsənov etiraz edib. Deyib ki mən çıxanda heç nə deməmisiniz. Həm də qəbz tələb edib, amma heç nə verə bilməyiblər. İnternational Medical Center-in direktoru Əli Əsgərovla görüşüb. O, valideynə deyib ki, 1000 manat ver şəhadətnaməni verim, yoxsa kimə istəyirsən, şikayət elə, verən deyiləm".
H.Novruzzadə xəstəxana ilə bağlı Google-da axtar apardığını və orada oxşar ssenari ilə bir necə hadisə haqda məlumata rast gəldiyini öyrənib:
"Düşünürəm ki, xəstəxana qəsdən, pul üçün uşaqların sağlamlağı ilə oynayır. Dövlətin verdiyi sənədi “zaloq” saxlamaq qanunsuzdur. Ortada ciddi bir qanunsuzluq var. Səhiyyə və Daxili İşlər Nazirliyindən bu hadisəni araşdırmağı xahiş edirəm".
Maraqlıdır ki sözügedən paylaşımın altında istifadəçilər adıçəkilən xəstəxana üçün bu kimi halların adi hal olduğunu qeyd ediblər.
Məsələ ilə bağlı qarşı tərəfin mövqeyini verməyə hazırıq.
