Deputat BNA-dan narazılıq etdi, qurumdan ona cavab gəldi
Bu gün Milli Məclisin plenar iclasında çıxış edən deputat Tahir Kərimli Bakıda parklanma yerlərinin olmadığını, amma gəlib hamını cərimələdiklərini bildirib.
Partiyasının qərargahı qarşısında maşın saxlamaq üçün 10 dəfə fırlandığını nildirən deputatın sözlərinə görə, həmin adamların məqsədi daha çox cərimə yazmaq və bundan faiz tutmaqdır.
AFN-in xəbərinə görə, Bakı Nəqliyyat Agentliyi deputatın çıxışına münasibət bildirib. Qurumun mətbuat katibi Mais Ağayev açıqlama yayaraq, deputatın statusundan asılı olmayaraq tələbə əməl etməli olduğunu qeyd edib:
"Ərazidə dayanma və durmanı qadağan edən nişan varsa statusundan asılı olmayaraq hamı bu tələbə əməl etməlidir. Digər bir yandan partiya qərargahından piyada 10 dəqiqəlik məsafədə Qış parkı avtomobil dayanacağı yerləşir.
Düşünürəm ki, Tahir müəllim nəqliyyat vasitəsini dayanacaqda park edib partiya qərargahına piyada getməklə digər vətəndaşlara da çox gözəl nümunə ola bilərdi.
Cərimələrdən faiz tutulmasına da aydınlıq gətirərək bildirim ki, dayanma-durma qaydalarının pozulmasına görə tətbiq edilən cərimələrə görə ödənilən vəsaitlər Nazirlər Kabinetinin müvafiq qərarına əsasən dövlət büdcəsinə daxil olur. BNA əməkdaşlarının əmək haqları cərimələrdən formalaşmır".
