Çin ABŞ-ın yeni gömrük rüsumlarına qarşı tədbirlər görəcək
Çin ABŞ-ın açıqladığı yeni gömrük rüsumlarına qarşı tədbirlər görəcəyini açıqlayıb.
Pekində keçirilən mətbuat konfransında Çin Xarici İşlər Nazirliyinin sözçüsü Quo Ciakun ABŞ prezidenti Donald Trampın bütün ticarət tərəfdaşlarına "qarşılıqlı tariflər" çərçivəsində elan etdiyi tarif artımlarını dəyərləndirib.
Tarif və ticarət müharibəsində qalibin olmayacağını ifadə edən sözçüsü Quo, Çinin qanuni maraqlarını qorumaq üçün qətiyyətli əks tədbirlər görəcəyini bildirib.
Quo ABŞ-ın Ümumdünya Ticarət Təşkilatının qaydalarını pozduğunu və qarşılıqlılıq bəhanəsi ilə Çindən və digər ölkələrdən idxala əlavə tariflər tətbiq etməklə qaydalara əsaslanan çoxtərəfli ticarət sistemini sarsıtdığını iddia edib.
Çin sözçüsü ABŞ-ı səhvini düzəltməyə və Çin də daxil olmaqla digər ölkələrlə ticarət mübahisələrini bərabər, hörmətli və qarşılıqlı faydalı dialoq yolu ilə həll etməyə çağırıb.
