Qusar xəstəxanasında vətəndaşlara vaxtı keçmiş dərmanlar verilir? - FOTO
Qusar Rayon Mərkəzi Xəstəxanasında pasiyentlərə vaxtı keçmiş dərmanların verildiyi iddia edilir.
Bu barədə “Şimal xəbərləri”nin baş redaktoru Müqəddəs Mehdiyev paylaşım edib.
O bildirib ki, xəstəxananın aptek bölməsinin əməkdaşı İ.Hacıyeva (onun həm də xəstəxana direktorunun həyat yoldaşı olduğu bildirilir) tibb işçilərinə vatsap nömrəsi vasitəsilə vaxtı keçmiş dərmanların xəstələrə verilməsinə dair tapşırıq verib.
M.Mehdiyev həkimlərin qrupundakı yazışmaları da paylaşıb və iddiaların reallığa söykəndiyini bildirib.
Qeyd edilib ki, yazışmanın kənara çıxmasından sonra İ.Hacıyevanın göstərişi ilə votsap qrupu bağlanıb: “Bəzi məlumatlara görə, Qusar Rayon Mərkəzi Xəstəxanasında ötən il 23 nəfər dünyasını dəyişib. Deyilənə görə, bu, rekord göstəricidir. Hazırda Qusar Rayon Prokurorluğunda xəstəxanadan edilən bəzi müraciətlər əsasında araşdırmalar aparılır. Ümid edirik ki, bu vatsap yazışması da ciddi şəkildə yoxlanılacaq və həqiqət üzə çıxacaq”.
“Qafqazinfo”nun əldə etdiyi məlumata görə, məsələ ilə bağlı hazırda Qusar Rayon Prokurorluğunda qeyd edilən məsələ ilə yanaşı, xəstəxana barəsindəki bir neçə digər vətəndaş şikayəti də araşdırılır.
