Süni intellektin səhvlərini düzəltmək frilanserlərin yeni peşəsinə çevrilib
Süni intellekt alətlərinin geniş yayılması ilə şirkətlər orijinal məzmun hazırlatmaq əvəzinə texnologiyanın yaratdığı qüsurlu materialları düzəltmək üçün frilanserlərə üz tuturlar.
AFN.az xəbər verir ki, dizaynerlər, mətn yazarları və video montaj mütəxəssisləri keyfiyyətsiz süni intellekt nəticələrini istifadə edilə bilən vəziyyətə gətirmək üçün intensiv çalışırlar.
İş dünyasında süni intellekt alətlərinin sürətlə yer tutması qlobal miqyasda sərbəst çalışan yaradıcı peşəkarların iş təsvirini köklü şəkildə dəyişir.
Bir çox şirkət xərcləri azaltmaq məqsədilə mətn, loqo, illüstrasiya və ya video eskizlərini süni intellektə hazırlatdırır, daha sonra ortaya çıxan pozulmuş, natamam və ya səhv nəticələri düzəltmək üçün frilanserlərə müraciət edir.
Sektorda “süni intellekt tullantılarının təmizlənməsi” adlandırılan bu işlər bir tərəfdən gəlir mənbəyi yaratsa da, digər tərəfdən çalışanları yaradıcılıqdan uzaq və yorucu prosesə sürükləyir.
Qlobal sərbəst iş platformalarından əldə edilən məlumatlar bu sahədəki tələbin kəskin artımını konkret şəkildə ortaya qoyur. Freelancer.com-un məlumatlarına görə “süni intellekti düzəltmək”, “süni intellekt illüziyası” və “süni intellekt xətası” kimi açar sözləri ehtiva edən iş elanları 87 faiz artıb.
Oxşar şəkildə Upwork platformasında səhvlərin aradan qaldırılması ilə bağlı işlər nəzərəçarpacaq dərəcədə artarkən, Fiverr-də aparılan düzəliş axtarışlarında da diqqətçəkən sıçrayış qeydə alınıb. Bu elanların böyük hissəsini qrafik dizayn işləri təşkil edərkən, video montajı, redaktə və mətn yazarlığı da yüksək tələbat görən digər sahələr sırasında yer alır.
Şirkətlər və startaplar süni intellektlə ilk eskizin hazırlanmasının vaxta qənaət etdiyini düşünsələr də, nəticələr çox vaxt peşəkar müdaxilə tələb edir.
Şəkillərdə artıq çəkilmiş ətraflar, bulanıq çap faylları və mənasız mətnlərlə qarşılaşan mütəxəssislər işi qaydaya salmağın bəzən nəyisə sıfırdan hazırlamaqdan daha çox zəhmət tələb etdiyini vurğulayırlar.
Buna baxmayaraq, işəgötürənlərin düzəliş prosesini daha sadə və ucuz iş kimi qiymətləndirməsi çalışanların qarşılaşdığı ən böyük çətinliklərdən biri kimi önə çıxır.
Avtomatlaşdırmaya açıq sahələrdə orijinal dizayn və mətn elanları azalarkən, platformalardakı rəqabət hər keçən gün daha da güclənir. Bəzi çalışanlar gəlir əldə etmək üçün süni intellekt səhvlərini düzəltməyi çıxış yolu kimi görsələr də, bir çoxu bu prosesin yaradıcılıqlarını tükətdiyini və ruhsuz dövrə çevrildiyini bildirir.
Süni intellekt texnologiyasının sürətlə inkişaf etməyə davam etməsi isə bu müvəqqəti təmizlik işlərinin nə qədər müddət ərzində məşğulluq təmin edəcəyi ilə bağlı suallar yaradır. Prosesin gələcəyindən narahat olan bəzi dizaynerlər artıq ənənəvi kətan və sulu boya kimi fiziki sənət sahələrinə qayıdaraq karyeralarını təmin etməyə çalışırlar.
