"SpaceX" Pentaqonda özünə necə yer elədi?
İlon Maskın rəhbərlik etdiyi "SpaceX" şirkəti ABŞ Müdafiə Nazirliyinin (Pentaqon) ən mühüm podratçılarından birinə çevrilib.
AFN.az xəbər verir ki, Amerikanın məşhur "Wall Street Journal" (WSJ) qəzetinin yaydığı məlumata görə, şirkət son illərdə əldə etdiyi milyardlarla dollarlıq müqavilələrlə Vaşinqtonun müdafiə və kosmos strategiyasında kritik bir mövqeyə yüksəlib.
Xəbərdə ABŞ rəhbərliyinin 2025-ci ildə "SpaceX" şirkətinə təxminən 4 milyard dollar vəsait ayırdığı və bu rəqəmin növbəti dövrdə daha da artmasının gözlənildiyi bildirilib. Şirkət ötən ay ABŞ Kosmik Qüvvələrindən iki böyük tender qazanıb. Bunlardan biri döyüş sistemləri üçün peyk rabitə şəbəkəsinin qurulmasını əhatə edir, digəri isə raket və təyyarə hərəkətlərinin orbitdən izlənilməsini təmin edəcək peyk sistemlərinin hazırlanmasını nəzərdə tutur. Sözügedən layihələrin ümumi dəyərinin 6,5 milyard dolları keçdiyi bildirilir.
Pentaqon rəsmiləri "SpaceX"in bürokratik prosesləri sürətlə keçə bilən strukturu, həmçinin raket və peykləri qısa müddətdə istehsal edib kosmosa buraxmaq potensialı sayəsində rəqiblərini qabaqladığını bildirirlər. Bu vəziyyətin şirkəti ənənəvi müdafiə sənayesi nəhəngləri olan "Lockheed Martin" və "Northrop Grumman" qarşısında üstün mövqeyə daşıdığı qeyd olunur.
Digər tərəfdən, ekspertlər "SpaceX"in müdafiə sahəsindəki təsirinin artmasının rəqabətin azalması və kritik layihələrdə yalnız bir şirkətdən asılılığın güclənməsi kimi riskləri də bərabərində gətirdiyinə diqqət çəkirlər. "Wall Street Journal" keçən il ABŞ Prezidenti Donald Tramp ilə İlon Mask arasında ictimaiyyət qarşısında yaşanan gərginlik zamanı Ağ Evdə aparılan müzakirələrdə "SpaceX"in müqavilələrinin ləğv edilə bilməyəcək dərəcədə kritik olduğu qənaətinə gəlindiyini də oxucularının diqqətinə çatdırıb.
