Tramp mübahisəli "Keystone XL" neft kəmərinin inşasını istəyir
ABŞ prezidenti Donald Tramp keçmiş prezidentlər Barak Obama və Co Bayden tərəfindən ekoloji səbəblərə görə əvvəllər ləğv edilən "Keystone XL" neft kəmərinin inşasını istədiyini bildirib.
Tramp "Truth" sosial media platformasında "Keystone XL" neft kəməri layihəsi ilə bağlı açıqlama verib.
"Keystone XL" boru kəmərinin tikilməsini istəyən Tramp qeyd edib ki, əvvəllər bu xətti çəkməsi gözlənilən şirkət tikintini dərhal başa çatdırmalıdır.
Kanada neftini Meksika körfəzindəki ABŞ neft emalı zavodlarına daşıyacaq kilometrlər uzunluğundakı neft kəməri layihəsinin gündə təxminən 800.000 barel neft ötürəcəyi gözlənilirdi.
ABŞ-ın keçmiş prezidenti Barak Obama 2008-ci ildə təqdim edilən "Keystone XL" neft kəməri layihəsini 2015-ci ildə ekoloji səbəblərə görə rədd etmiş, Tramp isə 2017-ci il martın 24-də layihəni təsdiq etmişdir.
ABŞ-ın keçmiş prezidenti Bayden də 2021-ci ildə vəzifəyə gəldikdən sonra layihəni ləğv edən fərman imzalayıb.
Digər tərəfdən, Kanada mərkəzli "TC Energy" boru kəməri layihəsini 2021-ci ildə dayandırmaq qərarına gəldiklərini açıqlayıb.
